مسلم قوم کو ایک سبق

اس موقع پر ایک بات عرض کروں وہ یہ کہ ۹ /نومبر کو بابری مسجد پر فیصلہ آنے کے بعد میڈیا والوں نے آر ایس ایس کے سربراہ موہن بھاگوت سے سوال کیا کہ کیا آپ اب بنارس کی گیان واپی اور متھرا کی شاہی مسجد کے خلاف تحریک چلائیں گے، تو بھاگوت نے اس وقت بہت شاندار جواب دیا جس سے نہ صرف آر ایس ایس کی پالیسی کا پتہ چلتا ہے بل کہ اس کی کامیابی کا راز بھی عیاں ہوجاتا ہے، موہن بھاگوت نے کہا کہ "ہم تحریکیں نہیں چلاتے بل کہ افراد پیدا کرتے ہیں"
اس جواب نے یقینا ہم جیسے لوگوں کو ایک بڑا سبق دے دیا اور راہ بھی دکھلا دی، ہمیں بھی ضرورت ہے کہ ہم اپنی تنظیموں اور اداروں کو اسی نقطۂ نظر سے دیکھیں اور انھیں ہر طرح کے شرور و فتن سے محفوظ رکھنے کی ہر ممکن کوشش کریں
اداروں سے افراد تیار ہوں جو ضرورت کے مطابق الگ الگ تنظیموں کو جنم دیں اور میدان میں تحریکیں چلائیں،  ہر مسئلے میں ہم اپنی سر پرست تنظیموں کی طرف پر امید نگاہوں سے نہ دیکھیں، ہاں ان کی رہنمائی اور مشورہ ضرور طلب کرتے رہیں، ایسی صورت میں کاموں کی تقسیم بھی ہوجائے گی اور ہماری تنظیمیں اور ادارے بھی ہر طرح کی بری نگاہوں سے محفوظ رہیں گے اور افراد سازی کا کام جاری رکھیں گے،  لہذا ضرورت اس بات کی ہے کہ ہم نظریاتی اعتبار سے اپنے سرپرست اداروں اور تنظیموں کے ساتھ جڑ کر تمام ملی، سماجی و سیاسی امور انجام دیں، اسی میں قوم کی بھلائی اور کامیابی ہے